Allmennsoge.
Korleis var det å gå på skulen for 80 år sidan, arbeida som "taus" (tenestejente) eller "sildatippe", vera ung i 1930 og 1960, driva gard i 1950 og 1980? Når kom straumen i Fusa? Kva tid fekk folk frysebok og når vart det vanleg med traktor på gardane? Kva var margarinfabrikken "Viking" og "Sævareid Karton- og Papfabrik"? Når starta ferjetrafikken  Fusa-Hatvik og kvifor vart Hålandsdal, Strandvik og Fusa slått saman til ein kommune? Dette - og mykje meir - skal du finna svar på i den nye bygdeboka for Fusa. Ho skal handla om den historiske utviklinga i Fusa dei siste hundre åra på område som folkesetnad, samferdsle, kvardagsliv, næringsliv, skule, kulturliv, kommuneadministrasjon og politikk. Samstundes skal boka gje nokre svar på kvifor Fusa kommune som politisk og geografisk eining har dei særtrekka me finn i dag. Boka skal vera lesarvenleg med sprek bokbunad, mange bilete og gode kart. Ho skal etter planen koma ut i år 2002.

Fotoregistrering.
Det skal samlast inn foto som kan gje innblikk i hendingar og levemåtar i Fusa dei siste hundre åra. Ny teknologi gjer det mogeleg å digitalisera bileta og lagra dei inn på cd-rom-plater. Eigaren får såleis original-fotografiet raskt attende.

"Bygdebok i nettet".
Me ønskjer og å bruka den nye datateknologien i formidlinga av bygdeboka og kjeldestoffet. På sikt håper me å kunna leggja ut på internett både tekst, foto og arkivmateriale. Førebels presenterer me nokre smakebitar frå dei rikhaldige kjeldene på heimesida vår.

Lokalhistorisk Arkiv i Fusa (LAF). Kjeldestoffet som er samla inn ligg i LAF på Fusa folkebibliotek i Kommunetunet. Her er lagsprotokollar, handskrivne blad, medlemslister, rekneskapsbøker, livsminne, songar, segner, gåter, ordtak, skisser av gamle gardstun, flyfoto frå heile kommunen, avisutklipp, folketeljingar, skuleoppgåver m.m. Men me treng meir! Kjenner du nokon som har møtebøker frå eit lag eller ein organisasjon, amerika-brev, gamle bilete, postkort eller dagbøker? Ta kontakt med bibliotek/kulturkontor! Bygdeboknemnd. Kommunestyret har vald ei bygdeboknemnd der desse er med: Knut Skåtun (leiar) - Vinnes, Anders Kåre Engevik - Sævareid, Brit Fosså - Eikelandsosen, Anne Martinsen - Hålandsdalen og Einar Nymark - Holmefjord.

Bygdebokforfatter Ella Marie Brekke Vangsnes

Forfattar.
Ella Marie Brekke Vangsnes (f. 1964) er tilsett som bygdebokforfattar. Ho er utdanna etnolog med historie som støttefag, har arbeidd med museumsformidling, som lærar og lokalavisjournalist. Ho var redaktør for krigsminneboka "Verda inn over dørstokken" i 1995. Ho er frå Voss, men har vore busett i Fusa kommune sidan 1992.